ብዙ ጊዜ ያልተጠኑና በድንገቴ ብቻ ጊዜ የሚወልዳቸው ነገሮች የሉም። በሚታይም በማይታይም መልኩም ቢሆን ነገሮች የሚሄዱት አስቀድሞ በተጠና ትልም መሠረትነት [ አንድም አስቀድሞ ባለ ደግም ክፉም ምኞትና ፍላጎት] ነው። የዓለም ብዙ ምስቅልቅሎች አስቀድመው የታቀደባቸው፣ ንድፍ የወጣላቸው (designed)፣ ማስፈጸሚያ ሥርዓትና መዋቅር (system and structure) የተዘጋጀላቸው ናቸው። በሥርዓት የመጣን ሁነት በእርግማን፣ በስሜትና በመሰለኝ ለማስወገድ መሞከር በእኔ ፊት ሞኝነት ነው።

ነገረ ሳይንስ

ሳይንስ ጥበብ ነው፤ ሃብት ነው፤ ታላቅ ነገርም ነው። ሳይንስ ድንቅ፣ ልዩና እልቆ ቢስ የሆነውን ሥነ ተፈጥሮም ሆነ ሥነ መለኮት በመግለጥ ረገድ ግን ድንክ ነው። ሳይንስን ለበጎነት ከመጠቀም አልፎ ያለልክ በሳይንስ የሚደገፍ አንድም እምነቴ ሳይንስ ነው የሚል ሰው ግን እጅግ ያሳዝነኛል። ሳይንሳዊ የሆኑ መስሏቸው ሳይንስ "ሀ" ብሎ የሚጀምርበትን መነሻ መሠረት ወዳለማስተዋል እንደሄዱ እንኳ የማይገነዘቡ አሉ። ጤናማ ሳይንስ ታላቅ ዋጋው እንዳለ ሆኖ ትህትና፣ ማስተዋልና ጥበብ ባልተለየው እምነት የሚኖር ሰው ቢኖር ግን የማይጨበጥና የሌለ የሚመስለውን ዓለም ወደማስተዋል፣ ወደማመን፣ ወደመረዳት፣ ወደማወቅና ከዚህም ባለፈ ገና ምድር ላይ እያለ ጥርጥር በሌለበት ፍጹም እርግጠኝነት በመኖር በዓይን ላይ ዓይን፣ በእጅ ላይ እጅ፣ በእውቀት ላይ ጥበብ፣ በጥበብ ላይ ድንቅን ይጨምራል።

የማያቋርጥ እድገት

ሰው ሊረዳ የሚችለው በደረሰበት ደረጃ ልክ ብቻ ነው። በደንብ የሰለጠነባቸውና ከደረጃው በታች ያሉ ነገሮች ቢኖሩ የተዋሃዱት እስኪመስሉ ድረስ ደርሶ አጥርቶ፣ አስፍቶና አራቆ ይረዳቸዋል። በልኩ ዙሪያ ያሉ ጉዳዮች ቢኖሩ እየተገነዘበ ይመረምራቸዋል፣ ደስ ይሰኝባቸዋል። በደንብ ጭብጥ ባያደርጋቸውም ደርሶባቸው ይነካካቸዋል። ከእሱ ደረጃ ጥቂት ከፍ ያሉ ነገሮች ቢነገሩት ደግሞ ይደመምባቸዋል፣ ይናፍቃቸዋል፣ ያደንቃቸዋል። ከእሱ ደረጃ እጅግ ከፍ ያሉ ነገሮች ቢኖሩ ግን ፈጽሞ ሊረዳቸው አይችልም፣ አይገቡትም፣ ተረት ተረትና ሞኝነትም ይመስሉታል። አለፍ ሲልም አይወዳቸውም፣ ይንቃቸዋል፣ ይሰድባቸዋል፣ ያሽካካባቸዋልም። ብዙ ጊዜ ድንቅ ሚስጥሮች፣ የረቀቁ ደረቅ እውነቶች፣ አንድም መዓዛ ሕይወቶች አንድም ራሳቸው ሕይወት የሆኑት ሁሉ የሚረገጡበት ምክንያት ይህ ነው። ለዚህም ነው ሰው በማያቋርጥ እድገት ውስጥ ሊኖር የተገባው።

ይበልጥ የሚያስፈልገን በምልዓት ያለው ነው

ለሕይወት የግድ የሆኑ ነገሮች በመጠን መብዛታቸው፣ በብዛታቸው ልክ ግን ዋጋቸው የተናቀ መሆኑን ሳስብ ይገርመኛል። ረብ ለሌላቸው ነገሮች ብዙ ሰው ሲራወጥ ይታያል። ከዚህም አልፎ ለእነዚህ ለሕይወት የረባ ጥቅም ለሌላቸው ጉዳዮች ውድ ሕይወት ይነጠቅበታልም። አምስት ስድስት ቀን ውሃ የሌለበት እጅግ ጥቂት ደረቅ ቂጣ ብቻ ብላ ቢባል የውሃን ዋጋ ሌላ ምንም ነገር እስከማያስደስተው ድረስ ደርሶ በአምስት ቀን ብቻ በሚገባ ያውቀዋል። ለደቂቃ አየር እንዳይወስድ የታፈነ ወይንም በ Oxygen Therapy ሕይወቱን የሚያስቀጥል ቢኖር በምልዓት በዝቶና ለብዙኀኑ ዋጋ ቢስ መስሎ የሚታየው የአየር - የኦክስጅን ዋጋ ምንነት ይገባዋል። በውድ ከምንገዛቸው ከብዙ ነገሮች ይልቅ ውሃ በብዛት ይገኛል፤ አብዝቶ ግን ያስፈልገናል። ከውሃ ይልቅ አየር በብዛት ይገኛል የበለጠ ግን ያስፈልገናል። ከአየርም ሆነ ከውሃ ይልቅ ግን ምሕረተ እግዚአብሔርና ፍቅረ እግዚአብሔር አንድም የእርሱ ጥበቃ ያለወሰን በምልዓት መልቶ ይኖራል። ምሉዕ ነውና ዋጋው አይገባንም።

ጊዜ መግዛት

ማን ያሸንፋል ቢሉኝ በምን ጉዳይ የሚለውን ልተወውና ጊዜን መግዛት የቻለ እላለሁ። በቃ ጊዜን መግዛት የቻለ እሱ አሸናፊ ነው።.